Pollinoz (gulchang allergiyasi) haqida

Pollinoz — bu o‘simlik gulchangiga (polenga) nisbatan kuzatiladigan allergik reaksiya bo‘lib, odatda ko‘zlar, nafas yo‘llari shilliq qavati hamda teri qoplamining zararlanishi bilan kechadi. Kasallik quyidagi belgilar bilan namoyon bo‘ladi: ko‘zlarda qichishish, qizarish, yoshlanish; burunda qichishish, oqish, bitish; aksirish, yo‘tal, nafas qisishi; terida esa qizarish va toshmalar paydo bo‘lishi mumkin.

Ba’zida pollinoz jarayonida ovqat hazm qilish tizimi, yurak-qon tomir tizimi va asab tizimi kabi boshqa organ va tizimlarning ham ishtiroki kuzatiladi.

Pollinoz mavsumlari

Pollinoz yil davomida uchta asosiy gullash mavsumida kuzatiladi:

• Daraxtlar gullash mavsumi: fevral oyidan may oyining boshigacha;

• O‘tlar gullash mavsumi: aprel oyidan iyun oyigacha;

• Begona o‘tlar gullash mavsumi: iyul-avgust oylaridan boshlab sovuq ob-havoga qadar davom etadi.

Pollinozning so‘nggi to‘lqini — bu begona o‘tlarning changlanish davri bo‘lib, u quyidagi o‘simlik oilalariga tegishli: sho‘radoshlar, murakkabguldoshlar, zubturumdoshlar va boshqalar.